السلام عليكم
أولا بالتوفيق إن شاء الله و ربنا يكرمك بالخير أيا كان و يرضيكي بيه
ثانيا من وجهة نظري حتحتاجي:
1- دراسة الجدوى لدراسة المشروع و توقع نجاح أو فشل المشروع قبل البداية.
2- البدء بمصانعة خارجية و القصد منها إن حضرتك حتشتري الخام و توديه لمكان يعمل عليه عملية الخياطة و تستلميه منتج و من وجهة نظري ده أفضل في المرحلة الأولى بسببين أ- تكلفة شراء الماكينات و دفع المرتبات حتبقى صفر نظرا لأن رأس المال قليل و يكفي للخامات و تكلفة التشغيل الخارجية و ب- خبرة حضرتك الغير متاحة حاليا للتنفيذ بنفسك.
3- بعد النجاح إن شاء الله حضرتك تشتري الماكينات اللازمة و توظفي العمالة و لا تحتاجي للتنفيذ بنفسك فأي مرحلة .
أما بقى لو حضرتك ناوية تعملي ده بنفسك, فحتحتاجي ماكنة سرفلة أو أوفر لخياطة أركان الطرحة. و الخياطة مش صعبة كل حاجة بتيجي بالتعلم والمثابرة , حتحتاجي تجربي في قماش رخيص و تظبطي رجلك و ايدك على المكنة, لو مش متاح نوعين الماكينات دول بالنسبة ليكي فممكن الماكينة المنزلي و حتجيبي جزء خارجي إضافي يتركب عند مكان الإبرة (رجل) تثني بيها أطراف القماش.
اللي محتاجة إنك تعرفيه
1- المتاح حاليا بالسوق و عليه طلب و الغير متاح اللي ممكن حضرتك تنفذيه للسوق و يكون عليه أيضا طلب.
2- الفئة اللي حتبقى عملاء متوقعين ليكي و عليه حيتحدد أسعار و خامات و ألوان و تصاميم.
3- تكلفة الخام و المراحل الأخرى من طباعة و غيره و النقل للمنتج و لو كميات كبيرة حنضيف التخزين.
و بالنسبة لأن رأس المال قليل ده مش العامل الأساسي لنجاح أو فشل مشروع حضرتك, محتاجة بس تفاصيل المشروع تبقى واضحة و تسويق قوي بالإضافة للنقاط المذكورة أعلاه.
أرجو إني أكون أفادتك و ربنا يوفقك .