انا عن نفسي بستخدم عادي البايبال والربط بيكون عن طريق اي بنك انت بتتعامل معاه. هتروح تستخرج منه كارت ائتماني بضمان حسابك او مرتبك او تعمل شهادة بلاتينية في البنوك الحكومية او وديعة (كل دة مقبول من خلاله تقدر تستخرج كروت ائتمانية) اهم حاجة الكارت دة يكون من شركة فيزا ويكون قابل للتعاملات على الانترنت وحط مليون خط تحت دي علشان البنك ميضحكش عليك وتضطر تروح كل شوية علشان تقدم طلبات تفعيل (غالبا بيكون الكارت دة لونه اسود او رمادي).
كدة انت قطعت المشوار الكبير معاك Credit Card Visa وبلاش ماستر والشركات التانية وتبدأ عملية الربط بالبايبال عادي خالص. النقطة التانية اللي لازم تعرفها انك تحاول تشتري بيها مش بس تستقبل فلوس علشان احيانا بتدخل في حوارات كدة غريبة ويوقفوا الفيزا لسبب او لآخر علشان انت بتستقبل بس. في حاجة كمان انت مش دايما هتقدر تاخد فلوسك دولارات ممكن تلاقي اوقات مبيردوش يطلعوا الفلوس غير بالجنية المصري فالنقطة دي محتاج تحطها فى اعتبارك.
في حلول تانية انا مجربتهاش ممكن انت تسأل عليها لو هي مناسبة ليك. في بنك HSBC اعتقد في كروت عندهم بتقبل التعامل المباشر مع البايبال بس دي انا معرفش عنها حاجة. وفي بعض الناس بتقدر تستخدم Western Union في استقبال الفلوس بالدولار مباشرة من مصدرها من غير وسيط بس بتدفع نسبة على الفلوس دي لانها بتتشحن لمصر وبتستلمها باليد من الفرع.
دي كل معلوماتي عن الموضوع دة. شخصيا بستخدم فيزا كريدت من البنك الاهلي طلعتها بضمان شهادة بلاتينية صغيرة على قد المبلغ اللي ممكن احتاج ادفعه لما احب اشتري حاجة. بقدر استقبل وفي نفس الوقت لما بحتاج اشتري حاجة بستخدمها على طول فا دي بتدخل مع دي وبتجنب مشاكل انها تقف لأى سبب كان. شوف انت الحل اللي يناسبك واسأل تاني وتالت ميضرش لغاية ما تلاقي حل ملائم وسهل ليك في محافظتك ومنطقتك ويكون سهل وقت ما تحتاج الفلوس تجيبها من غير وجع دماغ.
